FCAA 2023 duhlohna total bandh MNF in huaihawt dawn

by News Editor

Tualchhung News

ZORAM TODAY| 7th October, 2025: Vawiin hian MNF chuan National Executive Meeting, Central Hall, Venghluiah an nei a, an President Zoramthanga'n a kaihruai. MNF High Command meeting chuan October ni 29 hian Mizoram pumah Forest Conservation Amendment Act 2023, Mizoram sorkar-in a adopt duh lohna leh sut leh tura nawr nan Total Band huaihawt a rel.

He hunah hian MNF President Zoramthanga chuan thusawiin, "FCAA 2023 ZPM sorkarin a adopt hi kan duh lo tak zet a. MNF kan sorkar lai khan kan duh loh thu Assembly House-ah kan lo pass tawh a. ZPM sorkar-in hetianga a rawn pass ta mai hi a pawi hle. Kan duh loh thu leh Special Assembly koa sut leh tura ngenna Mizoram sorkarah kan thehlut tawh bawk a, chu chuan awmzia a nei lo a ni," a ti.

MNF President chuan, "He thil hian Martar-na hnam thinhnun a khawih a, na takin kan su dawn a ni," a ti bawk.

MNF PARTY RESOLUTION

Vawiin ni 07.10.2025-a MNF General Headquarters National Executive(High Command) Meeting, Aizawl Central Hall-a neih chuan a hnuaia Resolution te hi lungrual takin kan pass.

1. Mizoram inhumhimna bang, Peace Accord avanga kan neih India Constitution Art.371G engmahlova chantir a, FCAA 2023 pawmpuitu Pu Lalduhoma kaihhruai, ZPM Sawrkar thil tih pawizia hi a takin a lang chho zel dawn a. Kan ram rohlu tam tak central kuta lo pe rutu Chief Minister kan nei hi a pawi kan ti takzet a. A kaihhruai Sawrkarin Mizo Martarte thisen a lei chhuah hralh nana FCAA 2023 a pawm hi a tawp thlengin MNF chuan kan do dawn a. Hemi kawnga theihtawp chhuah mektu Tlawmngai pawl hrang hrangte inpekna chu a fakawm kan tiin, FCAA 2023 dodalna kawnga thawhho pui zel turin kan sawm takmeuh a ni. ZPM sawrkarin a pawmpuina sut thuai tura nawr nan ni 29, October 2025 hian rampum huapin Total Bandh kan nei dawn a, Zoram mipui thlawpna leh tawiawmna kan ngen tak meuh a ni.

2. Thingtam avanga Sazu puang mekin kuthnathawktute thlai nasa takin a suasam mek hi a pawi kan tiin, a tuartute kan tawrhpui takzet a. Sazu tihrem kawngah leh Sazuten an thlai leh a rah a tihchhiat sakte chhawmdawl kawngah Mizoram Sawrkar chu a tih tur a tilo nasa hle a ni. Kuthhnathawktu hmangaih ber anga insawi zur zut ZPM sawrkar khawsak dan hi MNF chuan kan dem takzet a. A rang thei ang bera Kuthnathawktute ngaihsak a, an harsatnate tuamhlawm nghal turin kan phut a ni.

3. Zoram hmun tina kawngpui chhe em emin a nghawng lirthei neitute leh a chhawrtu Mipuiten harsatna kan tawh mek hi a ngaihna hria inti, a taka thawk silo ZPM sawrkar hian zahna chang hria se kan duh a, a siamna tura mipuia chhiah nasa tak an lak tlingkhawm hmang hian a rang thei ang berin siam nghal rawh se.

4. Kan ram rorelna khawla MLA 40 ten ro an rel thin laia, CM in ZPM MLA 27 te chauhin rorel thin leh party dang leh NGOs te relpui an ngaih loh thu a sawi ta mai hi vanduaithlak kan ti a. Hetianga le lo taka thusawi thin Mizoramin Chief Minister kan nei hi a vanduaithlak kan tiin, a sawi hmasak leh hnuhnung zawk inkalh fo thin avanga mipuiten awih zawk tur hrelo a kan chiai thin hi a buaithlak kan ti a. Kan Chief Minister Pu Lalduhoma hi thudik chauh sawi tawh turin kan phut a ni.

5. ZPM Flagship Programme a kuthnathawktute thlai thar leisak an intiamna ah Hmunphiah, Sawhthing, Hmarcha leh Aieng te an hlawhchham pui vek hi Sawrkar laktlak loh kan neih tilang chiangtu a ni a. Kuthnathawktute Sawhthing man an bat hi a rang thei ang bera pe turin ZPM sawrkar kan phut a ni. Beiseina nena thlira thlangtlingtute bei tidawng em em tu sawrkar thlak tur hian MNF chu Mipui rintlak leh innghahngamna ni turin, kum 2028 Inthlanpuiah hnehna chang ngei turin kan inbuatsaih mek a. Theihtawp chhuahin hma kan la zel dawn a ni.

6. Ni 11, November 2025-a Dampa bial By Election lo awm turah hian hnehna sang tak kan chan a, he bial thahnem ngai taka lo enkawltu Pu Lalrintluanga Sailo, MLA hriatreng nan a sulhnu chhui tura MNF Official Candidate Dr. R. Lalthangliana, Sr. Vice President, MNF kan nei hi lawmawm kan tiin a tlin ngeina turin theihtawp kan chhuah dawn a ni. Dampa bial mipui zawng zawngte Dampa bial leh Mizoram tan khawngaih taka MNF Official Candidate lo vote vek turin kan sawm a ni.